Monday, 30 January 2012

माझी बल्लवगिरी - १ : 'फोडणीची पोडली'

गेले वर्षभर मी स्वत:हून एक उपक्रम हाती घेतलेला आहे. फार काही मोठा वगैरे नाही पण माझ्यासाठी खूपच महत्त्वाचा आहे. लहानपणापासूनच तसा मी खाण्या-पिण्याचा शौकीन पण माझे सारे चोचले आई-बहिणीच्या जीवावर पोसले गेले होते. मला स्वत:ला पूर्वी साधा चहादेखील बनवता यायचा नाही. पुढे असे काही प्रसंग घडले की मला प्रकर्षाने वाटू लागले की मला माझ्यापुरता तरी स्वयंपाक करता आला पाहिजे. म्हणून मग जेव्हा शक्य होईल तेव्हा मी स्वत:साठी स्वत:च काहीतरी बनवून खाऊ लागलो. सारं काही सुरळीत करता येऊ लागलं असं काही नाही, किंबहुना सुरुवातीला चुकाच जास्त झाल्या. पण आता हळू हळू मला स्वत:लाच माझ्यातला 'महाराज' (पक्षी: स्वयंपाकी) ओळखता येऊ लागला आहे हे मी आनंदाने इथे नमूद करू इच्छितो.

याचा प्रत्यय घेण्याचा मौका नुकताच मला मिळाला. एकटाच होतो आणि संध्याकाळच्या खाण्यासाठी तसं काहीच तयार नव्हतं. कालच्या इडल्या ८-९ आणि पोळ्या (कालच्याच) २ हाताशी होत्या. विचार केला काहीतरी बॅचलर्स डीश बनवावी. मग इतर आवश्यक साहित्याचीही जुळवाजुळव सुरू केली. मी घेतलेल्या गोष्टी -  

पोळ्या - २ 
इडल्या - ९ 
भुईमुगाचं तेल - ४ चमचे 
मोहरी - ४ (छोटे) चमचे 
जिरं - २ (छोटे) चमचे 
हळद - ३ (छोटे) चमचे 
तिखट - ३ (छोटे) चमचे 
हिंग - १/२ (छोटा) चमचा 
मीठ - चवीनुसार 
साखर - २ चमचे 

आता कृती -

पहिल्यांदा पोळी आणि इडल्यांचे तुकडे करून घेतले. पोळीचे थोडे बारीक आणि इडल्यांचे काहीसे मोठे तुकडे केले.
गॅसवर चढवलेल्या कढईमध्ये सोडलेलं भुईमुगाचं तेल गरम झाल्यावर त्यात आधी मोहरी टाकली. ती तडतडायला लागल्यावर त्यात जिरं, हळद, हिंग आणि तिखट टाकलं. फोडणी व्यवस्थित तयार झाल्यावर त्यात पोळी आणि इडलीचे तुकडे सोडले. हलक्या हाताने कालथ्याने हलवून ते फ्राय करून घेतले. व्यवस्थित फ्राय होतायत तोवर त्यात चवीनुसार मीठ आणि साखर पेरली. सर्व नीट मिश्रित करून घेतलं.

फोडणीची पोळी आणि फोडणीची इडली याचं एकत्रित कॉम्बिनेशन असलेल्या या डिशचं मी 'फोडणीची पोडली' असं नामकरण केलं. तयार झालेली 'फोडणीची पोडली' दिसायला तरी चांगली होती. तुम्हाला दाखवण्यासाठी बाऊलमध्ये घेऊन फोटो काढले. नंतर चवही घेतली. मला तरी चांगली वाटली. आधी आईसाठी ठेवायचा विचार होता पण थोडी थोडी करून सगळी मी एकट्यानेच खाऊन टाकली. आता एकदा केलीय तर आईसाठी पुन्हा करण्यात काहीच अडचण येणार नाही, नाही का? 


फोडणीची पोडली


फोटो माझ्या मोबाईल कॅमेर्‍यातून
(व्यंगचित्रातला माझ्यासारखा दिसणारा शेफ आंतरजालावरून साभार)

3 comments:

  1. वा! मस्त दिसतंय की! थोडी कोथिंबीर घातली वरून की जास्त छान दिसेल!

    ReplyDelete
    Replies
    1. खरंच की! थोडी कोथिंबीर भुरभुरली असती तर छानच दिसली असती 'पोडली'. पुढल्या वेळी नक्की टाकेन.

      आवर्जुन प्रतिसाद दिल्याबद्दल आभारी आहे, पैसाताई!

      Delete
  2. wah sundar

    u have inspired a "balavacharya" in myself also

    dadar la aalya var mala de " Podalee"

    ReplyDelete